По многу неизвесност и перипетии, кадар на ВМРО-ДПМНЕ ќе го води Советот на Општина Струга
Безмалку два месеца по локалните избори, Советот на Општина Струга денеска конечно избра претседател, со што беше надминат застојот во работата на општината – Советот ќе го води советникот од редовите на ВМРО-ДПМНЕ, Мите Стефоски.
Препорачано
По повеќенеделни несогласувања и неуспешни обиди на претходните седници, денешната седница резултираше со избор на претседател со мнозинство гласови. Стефоски ја доби поддршката од 14 од вкупно 23 советници.
„За мене е чест и задоволство да бидам претседател на Советот на Општина Струга и сакам да кажам дека ќе го водам принципиелно. Можеби нема да се согласувам со вашите мислења, но до крај ќе се борам да го кажам она што го мислам“, изјави Стефоски по изборот.
Со оваа одлука, Советот влегува во нова фаза на институционално функционирање. Поддршката за изборот дојде од советниците на ВМРО-ДПМНЕ, „Вреди“ и Независната листа на ексградоначалникот Рамиз Мерко.
Изборот беше оспорен од советниците на Националната алијанса за интеграција, предводена од ДУИ.
