Симпатичните и игриви кучиња од расата лабрадор ретривер веќе не се најпопуларни домашни миленици во Соединетите Американски Држави, соопшти Американскиот кинолошки сојуз.

Според нивните податоци, лабрадорот бил најпопуларна кучешка раса меѓу американските љубители на кучиња цели три децении, сè до 2022 година.

Во последните неколку години, кучињата од расата француски булдог полека, но сигурно стануваа сè почест избор за домашен миленик во американските домови. Главната причина за нивната популарност е дека, исто како лабрадорите, тие се одличен избор за секое семејство.

„Тие добро се сложуваат со другите животни и уживаат во создавањето нови пријатели меѓу луѓето“, велат од Американскиот кинолошки сојуз.

Освен францускиот булдог и лабрадорот, на листата со најпопуларните кучешки раси во 2022 година се најдоа и златниот ретривер, германскиот овчар и пудлицата.