Планина од ѓубре го блокира влезот во кочанската депонија, отпадот се истура покрај патот кон Пониква
Влезот во градската депонија на Кочани денеска е затрупан со отпад и комуналните возила на КЈП „Водовод“ не можат да влезат внатре за да го фрлат ѓубрето кое се собира од градот.
Купиштата отпад се расфрлани и од двете страни на патот кон Пониква, каде се шири силна смрдеа, а течноста од распаднатиот отпад се излева по коловозот.
На влезот во кочанската градска депонија веќе се натрупани десетици тони отпад за чие отстранување ќе биде потребен подолг период. Состојбата уште повеќе се влошува затоа што овде се носи и ѓубрето од соседните општини, во рамки на проектот за отстранување на дивите депонии и нивно регионално решавање.
Од комуналното претпријатие „Водовод“ истакнаа дека ќе направат контрола на терен за причините поради кои отпадот се исфрла на влезот од депонијата, по што ќе се преземат мерки за расчистување.