Косовската полиција утрово повторно потврди со официјално соопштение дека двајца мажи се уапсени под сомнение дека синоќа се обиделе да киднапираат малолетно девојче. Случајот официјално се води како кривично дело „Обид за киднапирање во соизвршителство“, објави Н1.

Додека шеснаесетгодишно девојче во придружба на нејзината мајка се движело по улицата „Звечанска“ во Северна Митровица, застанало возило со две непознати лица кои се обиделе да ја убедат да влезе во нивниот автомобил, пишува КоСсев.

Девојчето успеало да ги сними со својот мобилен телефон и веднаш ја известило полицијата, но осомничените побегнале во меѓувреме.

Само неколку часа по инцидентот, двајцата осомничени, по потекло од Јужна Митровица, кои биле под дејство на алкогол, биле идентификувани и уапсени, А.П. (41) и Г.М. (36).

Обвинителот нареди покренување постапка за „Обид за киднапирање во соучество“ и им одреди притвор од 48 часа. Поради нивната состојба на пијанство, нивното испрашување ќе продолжи.

Веднаш по инцидентот, КоСсев синоќа го пренесе сведоштвото на малолетно девојче, кое таа го даде на овој портал во присуство и дозвола на нејзините родители.

Девојката опиша дека осомничените во сив „голф 7“ со косовски регистарски таблички наводно се вратиле кај неа три пати, инсистирајќи да влезе во нивниот автомобил.

Како што рекла, еден од нив ја притиснал на возилото и ја принудил да го фотографира, по што успеала да избега. Потоа мажите продолжиле да ја следат, убедувајќи ја дека само сакаат „побрзо да ја однесат во градот“.

Благодарение на пријателот на нејзиниот татко, кој се нашол во близина во тој момент, и на нејзината смиреност, таа успеала да стигне до нејзината мајка и до помладиот брат. Заедно ги снимале осомничените, кои, според неа, не се откажале сè додека не дознале дека е повикана полиција.