Иранскиот претседател Масуд Пезешкијан во разговор со индискиот премиер Нарендра Моди изјави дека Иран не бара војна, туку го користи своето право на самоодбрана наспроти она што тој го нарече „дива американско-израелска агресија“.

Во телефонски разговор со индискиот премиер, Пезешкијан рекол дека Техеран „не ја започнал војната и не сака таа да продолжи“, туку дека ги напаѓа американските бази во регионот, кои, според него, биле извор на нападот, објави порталот „Прес ТВ“.

Тој ѝ се заблагодари на Индија за изразите на сочувство до иранскиот народ и нагласи дека Техеран ја смета земјата за важен пријател и економски партнер, пофалувајќи ги „избалансираните и конструктивни позиции“ на Њу Делхи на меѓународната сцена.

Пезешкијан рече дека нападите се случиле во време кога Иран преговарал со САД и се обидувал да ги реши споровите преку дипломатија, опишувајќи ја акцијата како кршење на меѓународното право и хуманитарното право. Тој потсети дека во нападите загинал водачот на Исламската револуција, ајатолахот  Али Хамнеи, како и високи воени команданти, додека 168 ученици биле убиени во напад врз училиште во јужниот град Минаб.

Иранскиот претседател, исто така, ги осуди убиствата на цивили, нарекувајќи ги пример за „државен тероризам“, но нагласи дека и покрај нападите, Иран останува посветен на проширување на соработката со Индија и други земји-партнери, особено преку формати како што се БРИКС и Шангајската организација за соработка ШОС.

За време на разговорите, Моди изразил загриженост поради ескалацијата на тензиите во регионот на Западна Азија и ги потврди пријателските односи на Индија со Иран, додавајќи дека Њу Делхи ќе ги поддржи дипломатските напори за смирување на ситуацијата.