Иран ќе ги обнови своите нуклеарни постројки „со поголема моќ“, изјави денес иранскиот претседател Масуд Пезешкијан.

Тој повтори дека Иран нема намера да произведува нуклеарно оружје, објави Ројтерс.

Иранскиот министер за надворешни работи, Абас Аракчи, во саботата изјави дека Техеран не сака директни преговори со САД за неговите нуклеарни или ракетни програми и повтори дека Иран нема да се откаже од збогатувањето на ураниум.

„Никогаш нема да преговараме за нашата ракетна програма и ниедна рационална личност не би се разоружала. Не можеме да го запреме збогатувањето на ураниум, а она што не може да се постигне преку војна, може да се постигне преку политика“, рече Аракчи, објави претходно Ал Џезира.

Според него, Иран е подготвен да преговара за да се справи со загриженоста за својата нуклеарна програма и повтори дека нејзината природа е „мирна“, објави Танјуг.