Петров: Ситуацијата во земјава не е погодна за избори, Владата има солидна поддршка
Не би сакал да зборувам кога ќе се случат следните избори, но мислам дека овој период сега не е погоден за избори. Бројни се проблемите во државата, а изборите не ги решаваат нив. Владата ќе ја поддржат од сите партии во коалицијата, 64 пратеници, што е солдина поддршка, изјави членот на Извршниот одбор на СДСМ, Андреј Петров во утринската програма на телевизија Телма.
Според него, досега сме имале Влади кои функционирале и со минимално мнозинство и додаде дека предлогот за гласање за новата Влада ќе биде доставен до Собранието наредната недела.
– Не можам да зборувам за кадровските решенија, но она што знам е дека се прави напор да се вклучат квалитетни луѓе од СДСМ и да се покаже капацитет пред граѓаните, објасни тој.
Како што кажа Петров, Ковачевски разговара со сите членови на партијата и работи да ги интегрира сите, без разлика на различните ставови по одредени прашања.
– Од негова страна има волја и енергија, но тоа не е еднонасочна улица, треба да се смета и на мислењето и на тие од другата страна. Сепак, кај него гледам желба да ги вклучи сите, вели тој.