„Перипетија продукција“ реализираше театарски хибриден колаж
На театарскиот фестивал „Квартиере дел арте“ во Витербо (Италија), на 8 ноември премиерно беше прикажан првиот дел од серијата кратки перформанси во рамките на театарскиот колаж „Амор Вичит“, работен според две микродрами на италијанските автори Фабио Марсон и Рикардо Табилио.
Проектот го обработува животот и делото на италијанскиот барокен сликар Чеко дел Караваџо, кој се смета за еден од најзначајните ученици од школата на Караваџо. Малку е познато за неговиот живот, а главна инспирација за проектот е податокот дека во 1613 година престојувал во селото Бањаја, недалеку од Витербо, каде што се претпоставува дека ја насликал својата една и единствена фреска.
Поради околностите наметнати од пандемијата и неможноста за учество во живо, проектот е реализиран во хибридна форма. „Перипетија продукција“ во соработка со „Ехо Анимато“, во периодот од 29 октомври до 3 ноември во Белград, подготви видео и аудио материјали кои се имплементирани во претставата.
Во меѓународната театарска копродукција учествуваат актерите Дарја Ризова и Александар Михајловски, како и режисерката Нина Николиќ, а целокупниот авторски тим вклучува автори од Италија, Србија, Северна Македонија, Босна и Херцеговина и Албанија. Проектот е поддржан од Министерството за култура на РСМ.
(Текстот е објавен во „Културен печат“ број 105, во печатеното издание на весникот „Слободен печат“ на 13-14 ноември 2021)