Пендаровски: Демократијата е во сериозна опасност кога довербата во институциите е мала
Нашиот развој од независноста до денес го ограничуваа многу фактори, а дел од цикличните кризи беа предизвикани од екстерни фактори врз кои ние имавме мало или никакво влијание. Но за лошите внатрешни состојби најголем дел од одговорноста паѓа на домашните политичари и политички партии, рече претседателот Стево Пендаровски во годишното обраќање во Собранието.
– Генерално, за неповолните внатрешни состојби во државата од кои граѓаните во висок процент не се задоволни, реално, најголем дел од одговорноста паѓа врз грбот на домашните политичари и политички партии, почнувајќи од првите гарнитури во раните 1990-тите, па сѐ до нас, денес, кои сме на чело на институциите на централно и локално ниво. Кога довербата во институциите е на ниско ниво, демократијата е во сериозна опасност, порача Пендаровски.
Според него, во таков амбиент популизмот и авторитарните тенденции кои се во подем, полесно ја реализираат својата цел, бидејќи демократијата не покажува доволно ниво на отпорност.
– Кога клиентелизмот и партиската лојалност се критериум за вработување и напредување во кариерата, не треба да изненадува слабоста на институциите. Политичките и физичките блокади кои ги гледаме во главниот град во изминативе месеци, сигурно нема да бидат последни, додаде претседателот Пендаровски.