Кошаркарите на Пелистер го освоија третото место за сезоната 2025/26 во „МТЕЛ“ Супер лигата откако славеа со 90:86 на денешната „мајсторка“ на гостински терен против ТФТ, за 2:1 во победи во оваа плејоф-серија. Битолчани на овој дуел беа дополнително ослабени со неиграњето на Брејси Дејвис, но сите останати покажаа и карактер и квалитет, давајќи свој придонес да се стигне до посакуваниот триумф.

Малешевиќ ја отвори мајсторката со тројка, по што Пелистер набрзина поведе со 7:2 со поените на Џенкинс. „Зелено-белите“ имаа целосна контрола над резултатот во првата четвртина, водеа со 12:6, потоа и со 23:15 по реализацијата на Крстевски, истиот кошаркар погоди тројка за 28:19, за првиот период сепак да заврши со 28:22 по тројката што за домашниот тим ја постигна Зафиров.

ТФТ успеа да се врати во вториот период, па по израмнувањето на 36:36 тренерот Даскаловски беше принуден да побара тајмаут во 16 минута од натпреварот. „Пелистерци“ се мачеа во нападот, но Стајиќ погоди две важни тројки и на одмор се замина со израмнети 44:44.

ТФТ отвори со водство од 50:44, но Пелистер набрзо се консолидираше, се врати резултатски, а потоа и повторно ја презеде контролата поведувајќи со 61:53 со серијата поени на Вилсон. Пелистер имаше и 65:53, но повторно краток период на невнимание му овозможи на домаќинот да се приближи на 65:61, за нов тајмаут на Даскаловски. Кризата во нападот продолжи, Пелистер не постигна ниту поен во последните три минути од третата четвртина, па во последниот период се влезе со 65:61 за битолскиот клуб.

Пелистер имаше водство од 71:66, но неколкуте грешки во нападот им овозможија на домаќините да се вратат и за нецела минута да поведат со 72:71. Советите на Даскаловски не вродија со плод, ТФТ набрзина поведе со 77:71, па стратегот на Пелистер мораше веднаш да земе уште еден тајмаут. Домашната предност од 79:73 експресно Пелистер ја стопи со тројките на Стајиќ и на Крстевски, потоа и поведе со положувањето на Крстевски (81:79 на четири минути до крајот). Пелистер имаше 88:81 и напад на 80 секунди до крајот, битолчани сепак дозволија домаќинот да се приближи на 88:86, по што беше направена лична грешка врз Малешевиќ на 14 секунди до крајот. Српскиот ас биеше прецизно, ставајќи печат на победата, на крајот изразена со конечните 90:86.

Дамјан Крстевски одигра уште еден одличен меч и со 23 поени ги предводеше стрелците на Пелистер, Џенкинг постигна 18, Малешевиќ 17 поени, а двоцифрен ефект во последниот меч сезонава имаа и Вилсон со 16 и Стајиќ со 14 поени. На спротивната страна Ташовски имаше 29 поени следен од Зафиров со 20.