Опасен тренд се шири кај младите, особено кај девојките во скопје, предупредува доктор Нико Беќаровски од Универзитетската клиника за токсикологија – диета со јајца и вино која може да биде погубна за црниот дроб. Следејќи ја „диетата“, позната од западните списанија уште од пред 50-60 години, а „воскресната“ денеска на интернет, неколку девојки веќе завршиле на клиниката.

Докторот предупредува да не се наседнува на нездрави и штетни практики во исхраната.

„Една стара „диета” промовирана 1964 година, а ревидирана и популаризирана преку едно светски влијателно женско списание во 2018 година, за жал станува сè попопуларна меѓу скопските тинејџерки. „Диетата” се состои од 3-5 варени јајца во текот на денот, стек навечер и конзумирање на 750 мл. црвено вино“, пишува д-р Беќаровски.

Кога некој се храни вака неколку недели, тоа може да предизвика „сериозни здравствени несакани ефекти и кај возрасни личности, а кај младите тинејџерки со нецелосно развиен C450, СЕРИОЗНИ ЦРНОДРОБНИ ПОРЕМЕТУВАЊА“, предупредува познатиот лекар.

„Првите вакви случаи веќе се регистрирани на УК токсикологија и УК Гастроентерохепатологија!! Родители, најдете малку време да проверите како се „хранат” Вашите деца, пред да биде предоцна. Девојки, спортот, пешачењето и здравата умерена исхрана се единствената вистинска диета за убав изглед“, вели докторот во објава на Фејсбук.