САД не ја финансираат Украина само со оружје туку ја сервисираат и Владата во Киев, но се очекува следниот месец американските власти да престанат да ги финансираат платите на Украинците и другите државни трошоци поради недостиг на нови парични инјекции од американскиот Конгрес, јави весникот „Волстрит џорнал“, пренесува МИА.

САД и другите земји спонзори всушност обезбедуваат плати за 150.000 украински државни службеници и половина милион наставници, универзитетски професори и работници во образованието, а финансираат и други државни трошоци, од здравствената заштита до субвенциите за домување.

Американскиот државен секретар во телефонски разговор ги повикал републиканските пратеници во нацрт-законот за привремено финансирање на владата да вклучат средства за помош на Украина, за да можат САД да продолжат да обезбедуваат помош за Киев.

Но, Конгресот, сепак, донесе закон што не предвидува такви средства.

Според „Волстрит џорнал“, властите во Вашингтон и Киев сега се обидуваат да сфатат како кратењата на финансиската помош ќе влијаат врз способноста на Украина да ја финансира својата влада и да ја поддржи својата економија.