Од понеделник ќе се чистат езерцата и каналите во Градски парк
Екипи на јавното претпријатије „Улици и патишта” од понеделник започнуваат со комплетно чистење на каналите и езерцата во првиот и во вториот дел од Градскиот парк, кои, како што тврдат, не се чистени околу пет години, за што во тек се подготвителни активности.
Во првата фаза се стопира дотокот на вода и се заловува и згрижува рибниот фонд во соодветни услови за чување се до негово повторно враќање. Со пумпи се вади останатата количина на вода во езерата и се суши површината, по што во втората фаза следува машинско чистење на езерцата од лисја, отпадоци, мил и наноси од земја. Се чисти и каналот по кој тече вода во езерскиот систем во паркот по што во завршната фаза се полнат езерата – ја објаснуваат постапката од „Улици и патишта“.
Активностите за чистење на езерцата во Градскиот парк ќе се изведуваат и во наредниот период, а од претпријатието апелираат до граѓаните да не фрлаат отпадоци во каналите и во езерцата и да ја одржуваат хигиената на зелените површини во паркот.