Администраторите на имотот на Џефри Епстин се согласија да платат околу 35 милиони долари за решавање на групна тужба во која двајца советници на финансиерот се обвинети за помагање и поттикнување на сексуална експлоатација на млади жени и тинејџерки, пренесува Блумберг.

„Бојс Шилер Флекнер“, адвокатската канцеларија што ги застапува жртвите на Епстин, го објави договорот во документ поднесен до федералниот суд на Менхетен.

Договорот, доколку биде одобрен од судија, ќе стави крај на тужбата поднесена во 2024 година против поранешниот личен адвокат на Епстин, Дарен Индук, и неговиот поранешен сметководител, Ричард Кан, кои се коменаџери на имотот на финансиерот.

Администраторите на имотот на Епстин, исто така, создадоа фонд за обештетување на жртвите, кој веќе исплати околу 121 милион долари, додека 49 милиони долари се дадени во дополнителни спогодби.

Ниту Индук ниту Кан не признаа какво било кривично дело во спогодбата објавена во четвртокот, рече нивниот адвокат.

„Бидејќи не направија ништо лошо, беа подготвени да ги оспорат тужбите против нив до судењето, но се согласија да посредуваат и да ја решат тужбата со цел да се стави крај на сите потенцијални тужби против имотот на Епстин“, рече Даниел Вајнер.

Адвокатот додаде дека договорот ќе понуди „доверлив пат за финансиска компензација“ за жртвите на Епстин, кои сè уште не ги решиле своите побарувања против неговиот имот.

Адвокатската канцеларија на жртвите поднесе тужба во 2024 година против двајцата коменаџери на имотот на педофилскиот брокер, обвинувајќи ги за создавање сложена мрежа од компании и банкарски сметки и, преку нив, за прикривање на злоупотребите и плаќање на жртвите и нивните регрутери.

Адвокатската фирма „Бојс“ претходно помогна да се постигнат спогодби од 365 милиони долари со „Џеј Пи Морган Чејс“ и „Дојче Банк“, откако ги обвини дека ги игнорираат црвените знаци за Епстин, кој беше еден од нивните добри клиенти.

Претседателот на хотелската групација „Хајат“, Томас Прицкер, поднесе оставка поради контакти со Епстин