Не очајувајте ако облеката ви ја променила бојата при перење – постојат неколку едноставни трикови со кои може успешно да ја вратите во првобитна состојба, пишува „Вечерњи лист“.

Доколку некое парче пуштило боја и ги обоило останатите алишта во машината, најпрво треба да откриете кој е „виновникот“ и веднаш да го отстраните од останатата облека.

Потоа, обојените парчиња повторно ставете ги на перење. Освен стандардниот детергент, додадете и средство за избелување – но внимавајте тоа да не содржи хлор, бидејќи може дополнително да ја оштети ткаенината.

Клучно е да реагирате навреме и да не дозволите облеката да се исуши. Отстранувањето на бојата е многу потешко откако дамките ќе се фиксираат со сушење.

Ако, сепак, облеката веќе се исушила, решението бара малку повеќе трпение. Во тој случај, потребно е обојените парчиња да ги потопите во вода во која претходно сте раствориле прашкаст детергент. Оставете ги да отстојат најмалку осум часа, па проверете го резултатот.

Доколку бојата не се отстрани од првпат, постапката може да се повтори додека не се постигне посакуваниот ефект.

Со навремена реакција и правилен пристап, дури и ваквите незгоди при перење може успешно да се решат.