Не е само количината на протеини што ја консумираме важна кога станува збор за градење мускули, туку и квалитетот и хранливите материи што доаѓаат со нив. Затоа спортските диететичари истакнуваат една храна пред вообичаените избори како пилешки стек.

Всушност, тоа е лососот, кој сè повеќе се препорачува како најдобар протеин за зголемување на мускулната маса. Експертите нагласуваат дека комбинацијата од протеини и дополнителни хранливи материи прави клучна разлика, пишува „Итинг вел“.

– Лососот е врвен протеин за градење мускули бидејќи обезбедува висококвалитетни протеини со моќни хранливи материи кои го поттикнуваат закрепнувањето и растот – рекла спортската диететичарка Ејми Гудсон.

Оваа риба ги содржи сите девет есенцијални аминокиселини потребни за раст и закрепнување, а порција од 100 грама обезбедува околу 22 грама протеини.Леуцинот, аминокиселина неопходна за синтеза на мускулите, особено се издвојува.

Јаси Ансари објаснува дека леуцинот „делува како прекинувач што го започнува и активира процесот на градење мускули“.

Покрај протеините, лососот е богат со долговерижни омега-3 масни киселини ЕПА и ДХА, кои помагаат во закрепнувањето по тренингот.

– Антивоспалителните ефекти на омега-3 мастите може да бидат причината зошто е докажано дека ја намалуваат болката во мускулите по вежбање – рекла Гудсон, додавајќи дека тие го поддржуваат здравјето на мембраните на мускулните клетки.

Лососот е исто така еден од ретките природни извори на витамин Д, хранлива материја која е поврзана со силата и одржувањето на мускулната маса. Ниските нивоа на витамин Д, од друга страна, се поврзани со губење на мускулите.

Иако лососот е моќен сојузник во градењето мускули, експертите велат дека е важен холистичкиот пристап. Ансари советува да се осигурате дека внесувате доволно калории, јаглехидрати и масти, заедно со редовни вежби за сила.

Гудсон препорачува распределување на внесот на протеини во текот на денот, со цел околу 20 до 30 грама на секои три до четири часа, а таа исто така ја нагласува важноста на хидратацијата. Доволното спиење, помеѓу седум и девет часа, е исто така клучно за закрепнување и раст на мускулите.