Американскиот производител на авиони „Боинг“ откри нов софтверски проблем кај приземјениот модел „737 макс“, но компанијата не очекува тој да го одложи враќањето на воздухоловот во редовна употреба, кон средината на оваа година.

Тоа е најмалку третиот софтверски проблем што е откриен откако „737 макс“ беше приземјен во март минатата година, по двете авионски несреќи, во кои загинаа 346 лица, пренесуваат агенциите.

Од „Боинг“ наведуваат дека проблемот бил откриен при промените што се изведуваат на софтверот на моделот „737 макс“, јавија американските медиуми.

Грешката била воочена кај функцијата за предупредување на пилотите за системот што се користи за авионот да се насочи нагоре или надоле, со помош на придвижување на опашката на леталото.