Владата во Приштина најави дека Законот за странци и Законот за возила ќе почнат да се применуваат од утре, 16 јануари, а веста ја објави вршителот на должноста заменик-претседател на владата на привремените приштински институции, Бесник Бисљими, наведувајќи дека првата фаза, до 15 март, ќе биде информативна, а потоа законите ќе се применуваат во целост, пренесе Блиц.

Во првата фаза од примената, на посетителите кои влегуваат на Косово и Метохија ќе им биде обезбеден информативен материјал за специфичните процедури и правила.

Овој период ќе трае до 15 март, а по тој датум, според Бисљими, ќе започне целосната примена на законите.

Бисљими преку својот Фејсбук профил порача дека двомесечната кампања треба да се искористи за почеток на процесот на „суштинска интеграција на здравствениот и образовниот систем“.

Владата во Приштина најавува дека овој период на афирмативна примена треба максимално да се искористи за почеток на процесот на суштинска интеграција на здравствениот и образовниот систем на целата територија на КиМ, напиша Бисљими на Фејсбук, без други детали.

За примената на Законот за возила, од полицијата велат „дека тоа ќе значи дека возилата со српски таблички ќе се третираат како странски, дека не можат да учествуваат во сообраќајот на Косово подолго од три месеци или ако овластеното лице за управување со возило со српски таблички има српска лична карта издадена од полициските управи на МВР на Србија, изместени од Косово и Метохија“.

Ќе започне и строго почитување на Законот за странци кога станува збор за личните документи, односно сите оние кои немаат таканаречени косовски документи ќе мора да се пријават за дозвола за престој во рок од 72 часа.