Новата книга на Владо Јаневски е наменета за младата публика, но и за возрасните
Наскоро од печат ќе излезе најновото книжевно остварување на Владо Јаневски. Авторот ѝ е познат на читателската публика со романи за возрасни, но овојпат се работи за илустрирана книга за деца, која ќе биде објавена од издавачката куќа „Стрип Квадрат“ од Скопје.
– „Палавковците Влатко и Емче“ е книга за сите непораснати и пораснати деца, која плени со ведрината на својата содржина. Низ куси умно-хумористични епизоди го следиме растењето не само на Владо и Емче, туку и на нивните родители. Една од важните работи во развојот на секое дете, а која често сe заборава, е токму хуморот. Cмислата за хумор е добар показател за степенот на развиеност на когнитивните способности, особено на имагинацијата и користењето на јазикот. За да се постигне тоа, на децата им е потребна социјализација – општење и споделување искуства со други деца и возрасни преку што учат и почнуваат да ги препознаваат логичките грешки и апсурдноста – посочува авторот.
Иако првенствено наменета за деца, книгата „Палавковците Влатко и Емче“ е подеднакво интересна и за возрасните, кои ќе се насмеат кога ќе ги препознаат ликовите и ситуациите со кои често се сретнуваат во секојдневниот живот. Јаневски е автор и на текстот и на илустрациите, а резултатот е динамична и жовијална книга позитивно оценета и препорачана за објавување од рецензентите Владимир Мартиновски и Маја Петрушевска.
Владо Јаневски е писател, сликар, илустратор, стрип-уметник, светски патник и до неодамна активен на полето за истражување и развој во водечка светска компанија. Роден е во Македонија, каде завршил високо образование на УКИМ во Скопје. Од 1989 година живее во Сиднеј, Австралија.
(Текстот е објавен во „Културен печат“ број 167, во печатеното издание на весникот „Слободен печат“ на 18-19 февруари 2023)