„Нестле“ соопшти дека повлекува одредени серии од своите клучни производи бебешка формула, вклучувајќи ги и адаптираните формули SMA, BEBA и NAN, низ цела Европа поради можна контаминација со токсин што може да предизвика гадење и повраќање.

Повлекувањето, кое започна во помал обем во декември, претставува нов предизвик за новиот извршен директор на „Нестле“, Филип Навратил, кој се обидува да го поттикне растот на компанијата со реконструкција на своето портфолио по период на превирања во менаџментот, објави „Ројтерс“.

Компанијата доцна вчера изјави дека не се потврдени случаи на болест или симптоми поврзани со кој било од повлечените производи.

Откако беше идентификуван проблем со квалитетот на состојка набавена од водечки добавувач, „Nestle спроведе тестирање на сите масла од арахидонска киселина и соодветни мешавини од масла што се користат во производството на потенцијално засегнати производи од формула за бебиња“, изјави портпаролот на компанијата.

„Нестле“ има речиси една четвртина од глобалниот пазар на формула за бебиња, во вредност од околу 92,2 милијарди долари, според податоците од аналитичката фирма „СкајКвест Технолоџи Груп“, објави „Ројтерс“.

Компанијата не објавува конкретни бројки за продажба по сегмент, но формулата за млеко е дел од одделот за исхрана и здравствени науки на швајцарската компанија, кој учествуваше со 16,6 проценти од вкупната продажба на компанијата, проценета на 91,4 милијарди швајцарски франци (115,35 милијарди долари) во 2024 година.

„Нестле“ повлече серии од своите производи SMA, BEBA и NAN во Австрија, Данска, Финска, Франција, Германија, Ирска, Италија, Норвешка, Швајцарија и Велика Британија, предупредувајќи за можното присуство на цереулид, токсин произведен од одредени соеви на бактеријата Bacillus cereus.

Токсинот „малку е веројатно дека ќе се инактивира или уништи со готвење, врела вода или за време на подготовката на формула“, соопшти Агенцијата за стандарди за храна на Велика Британија.

„Доколку се проголта, може да доведе до брзо појавување на симптоми“, вклучувајќи гадење, повраќање или грчеви во стомакот.

Норвешкиот орган за безбедност на храната соопшти дека нема акутен здравствен ризик.

Австриското Министерство за здравство соопшти дека повлекувањето опфаќа повеќе од 800 производи од повеќе од 10 фабрики на Нестле, што го прави најголемото повлекување на производи во историјата на компанијата.

Компанијата ги објави сериските броеви на производите продадени во различни земји кои не треба да се консумираат и рече дека работи на минимизирање на какви било прекини во снабдувањето.

Исто така, рече дека е идентификуван потенцијален ризик во една од фабриките на Нестле во Холандија.