Необично вкусен рецепт на Стефанија Несторовска: Киноа пита со блитва и праз
Ако постои кралица меѓу питите, тоа е питата со праз. Речиси никој не може да одолее на нејзината арома и вкус.
А, благодарение на вештите раце и на инвентивноста на младата Стефанија Несторовска што стои зад инстаграм-профилот и блогот snestorovska.com, секогаш имаме можност да пробаме нешто интересно и несекојдневно. Денеска уживајте во неповторливиот вкус на оваа киноа пита со блитва и праз.
Состојки:
– 200 грама киноа, варена**
– 4 јајцa
– 6 листови блитва, ситно сечкана
– 3/4тини од цел стап праз, ситно сечкан
– 1 лажичка сол
– 4 лажици маслиново масло
– сусам (по желба, за топинг)
** киноата измерете ја пред варење. За варење јас го користев размерот 1:3. Додајте ја киноата во измерената количина вода, оставете да зоврие, намалете ја температурата на ниско и оставете да се вари десетина минути. Тргнете од оган, поклопете со капак или крпа и оставете така додека водата комплетно не впие.
Подготовка:
Рерната се загрева на 210 степени и се премачкува тава за печење. Јас користев тркалезна тава од 25-26 см. Мојата беше нелеплива, па не додадов хартија за печење.
Во голем длабок сад се додава варената киноа (задолжително да биде изладена) и се додаваат јајцата, па се промешува убаво додека не се соединат.
Се додаваат и сите други состојки и повторно убаво се промешува.
Се додава смесата во тавата за печење, се израмнува и одозгора се додава сусамот.
Се пече 30 минути. Оставете да се излади пред да сечете.
Питата може да ја чувате во затворен, стаклен сад во фрижидер до 4-5 дена или на собна температура 1-2 дена.
Забелешки и совети:
→ Бидете креативни со составот – јас ја сакам оваа комбинација на блитва со праз, но слободно може да адаптирате. Додадете фета, кашкавал, пршута, маслинки, урда и слично…
→ Јас лично не сум пробала, но според вашите успешни обиди – киноата може да се замени со некоја друга житарка. Кус кус, хелда, цело зрно овес и слично…