Неготинка телефонски вршела притисок кај жена да гласа за една политичка партија, напоменувајќи ѝ дека е корисник на ИПАРД помош. За неа Јавното обвинителство Кавадарци оформи предмет за кривично дело „повреда на слободата на определување на избирачите“ од член 160 од Кривичниот Законик.

Предметот е во предистражна постапка и се преземаат дејствија за да се утврди дали постојат елементите на пријавеното кривично дело или друго кривично дело кое се гони по службена должност.

Во Јавното обвинителство Кочани примени се известувања од МВР за организирано носење гласачи на избирачко место.

 Јавен обвинител веднаш даде насоки за проверка и прибирање податоци дали при превозот на каков било начин им се влијаело на гласачите во врска со остварувањето на нивното гласачко право, велат од Обвинителството.

Анонимен граѓанин во Ростуше пријавил дека едно лице вршело поткуп на гласачи.

ОЈО Гостивар веднаш даде наредби и насоки, беа направени детални проверки, при што наводите не се потврдија со ниту еден доказ. Освен ова, јавните обвинителства постапуваат и вршат проверки за сите други изолирани настани за кои јавноста претходно беше информирана. Сите евентуални сомненија за кривични дела кои би можеле да го нарушат изборниот процес ќе бидат испитани, а предметите ќе имаат приоритет на постапување во јавните обвинителства. До затворањето на избирачките места, изборниот ден помина генерално без поголеми нарушувања на гласањето и пријави за изборни инциденти, истакнуваат од Основното јавно обвинителство.