По оставките на директорите на двете универзитетски клиники – Клиниката за детски болести и Клиниката за радиотерапија и онкологија, д-р Аспазија Софијанова и д-р Никола Васев, денеска се назначени нови директори.

Вчера оставка поднесе и организацискиот директор на Детската клиника, Аљајдин Мемеди.

Организацискиот директор на оваа Клиника се разрешува од функцијата пред истекот на времето за кое е именуван, поради утврдени нерегуларности во извештајот од извршената контрола на работењето на оваа Клиника. Контролата е спроведена од Фондот за здравствено осигурување, се вели во соопштението од МЗ.

Во понеделникот оставка поднел и Меритон Чивули, шеф на кабинет на министерот за здравство Беким Сали. Фокус пишуваше дека Чивули вршел притисоци врз директорите на клиникте откако на дел од нив им праќал списоци со имиња и презимиња на вработени Албанци, кои требало да се стават на раководни позиции во дел од болниците, бидејќи според него, имало премалку раководители- Албанци во Клиничкиот центар.

Министерот Беким Сали во изјава за Фокус тврди дека смената на директорите е поради скандалите поврзани со нивната работа.

-Во последниот период и на двете клиники имаше доста скандали поврзани со работата на директорите и поради тоа мораше да се преземе ваков чекор. На тој начин се создадоа и сомнежи околу нивната работа и затоа тие денес си поднесоа оставки и на нивно место ќе бидат назначени нови директори, рече Сали.

Скандалот со директорката на Детска Клиника д-р Аспазија Софијанова го откри ТВ Клан и се однесуваше на исплата на дежурства кои кај неа биле повисоки од платата. За Онкологија е врзан скандалот со цитостатиците, иако д-р Васев тврдеше дека дал оставка од лични причини.