Над 1,1 милион желки кои живеат во морињата се нелегално убиени во изминатите 30 години, се наведува во една нова студија, која ја објави Гардијан.

И покрај законите за нивна заштита, научниците од Државниот универзитет во Аризона проценуваат дека околу 44.000 желки во 65 земји биле нелегално убивани и експлоатирани секоја година во изминатата деценија.

Џеси Сенко, асистент на Државниот универзитет во Аризона и еден од водечките автори на студијата вели:

„Бројките се навистина високи, но и не доволно прецизни, сметаме дека овој број е многу повисок, бидејќи едноставно многу е тешко да се процени каков било вид на нелегална активност“.

Желките кои живеат во морињата се ловат за храна, за употреба во традиционалната медицина и за продажба како артефакти, декор или накит. Според ОН, ловот и трговијата со желки е дел од глобалниот нелегален пазар на диви животни вреден дури 23 милијарди долари годишно.

Во студијата се наведува дека 43.000 желки биле дел од нелегална трговија помеѓу 1990 и 2010 година, иако веруваат дека ова е веројатно огромно потценување на точниот број, рече Сенко.

Југоисточна Азија и Мадагаскар се жаришта за лов на овие желки, се вели во извештајот објавен во списанието Глобал Чејнџ Биолоџи.

Виетнам е местото каде што започнува најголемиот дел од нелегалната трговија со желки, а Кина и Јапонија се најпопуларните пазари за нелегални производи од желки.