Трансфер сагата со Роџерс Мато од редовите на Вардар како полека да го добива конечниот епилог и според најновите информации како победник од целиот „циркус“ изгледа ќе излезе тимот на Хартс.

По вчерашната објава на Хартс дека постигнал договор со Мато, денеска од таборот на Вардар стигна информација дека клубот прифатил понуда од Спортинг Канзас Сити од американската МЛС лига. Сепак, целата ситуација доби нов пресврт откако американскиот клуб официјално се повлече од трката.

Во изјава за „Единбург њуз“, од Спортинг Канзас потврдија дека се откажуваат од трансферот, нагласувајќи дека напаѓачот веќе има договор со шкотскиот клуб.

„Спортинг Канзас Сити ја разгледуваше можноста за трансфер на Роџерс Мато, но тој одлучи да потпише преддоговор со Хартс и му посакуваме сѐ најдобро во иднина“, соопштија од американскиот клуб.

Договорот уште еднаш го потврдија и од Хартс.

„Имаме потпишан договор со играчот и сме целосно смирени околу ситуацијата“, изјави портпаролот на шкотскиот клуб.

Така доколку не дојде до некаков пресврт, Мато по завршувањето на тековната сезона ќе го облече дресот на Хартс.

Циркус каков што ретко се гледа: Вардар сега објави дека го продал Мато во САД