Десетици кучиња скитници секојдневно можат да се забележат на гробиштата „Бутел“. Глетката на кучиња што талкаат покрај гробните места барајќи храна што ужалените граѓани ја оставиле на гробовите што ги посетиле, честопати создава револт кај населението и страв, затоа што граѓаните се плашат да пристапат до вечните почивалишта на нивните блиски.

Од „Бутел“ АД Скопје велат дека доколку забележат кучиња што барајќи храна талкаат низ гробиштата, веднаш ги известуваат надлежните задолжени за заловување на кучиња од ЈП „Лајка“, кои досега неколкупати имаат постапено по ваквите нивни барања.

-Доколку има поплаки од граѓаните дека имаат забележано кучиња или доколку наши вработени забележат кучиња, ние веднаш пријавуваме до ЈП „Лајка“ – велат од Бутел АД Скопје.

Според нив, кучињата најчесто бараат оставена храна и затоа се собираат таму.

Проблемот околу кучињата ни се појавува и поради тоа што многу често се случува граѓани токму во близина на гробиштата да носат кучиња и тука ги оставаат. Не знаеме дали тоа го прават бидејќи веруваат дека тука за нив има храна – информираат од претпријатието.