Натпреварот одигран во понеделникот против КК Тиквеш – Голден Игл им донесе бодови на кошаркарите на МЗТ Скопје Аеродром, но не и радост поради повредата на Андреј Магдевски, кој при еден од нападите кон противничкиот кош почувствува болка, падна и мораше да се пресели на клупата.

Актуелниот македонски шампион известува дека подоцнежните снимки и лекарски прегледи покажаа дека станува збор за потешка повреда на коленото, поради која го чека повеќемесечно отсуство, што значи дека ќе го пропушти останатиот дел од сезоната.

Ова, воедно, е и сериозен проблем за тимот на Васко Атанасов, особено ако се знае дека во моментов надвор од стројот поради повреди се и Војдан Стојановски и Андреј Маслинко.

Уште неколку првотимци имаат поситни проблеми кои се надеваат од клубот дека нема да ги спречат да ги одиграат средбите што нѐ очекуваат.

Следен предизвик за МЗТ е гостувањето кај КК Кожув, закажано за в сабота од 18.00 часот.