Минатогодишниот МВП играч на црногорското првенство го засилува ростерот на Академија ФМП за натпреварувачката сезона 2020/21.

Стефан Крстајиќ кој минатата сезона со 25 индексни поени беше прв во првенството на Црна Гора доаѓа во македонскиот клуб од редовите на екипата на Приморје, каде што постигнуваше 22 поена, 5.6 скока, 5 асистенции и 2 украдени топки по натпревар.

25-годишниот играч кој игра на позициите 1 и 2, во својата кариера има настапувано за екипите на Златибор од Србија и Приморје од Црна Гора, а за преминот во Академија ФМП изјавува:

– После Србија и Црна Гора, ја продолжувам мојата кариера во Македонија и ми претставува големо задоволство што ќе го носам дресот на Академија ФМП. Успеавме за кратко време да се договориме, бидејќи препознав дека се работи за сериозен клуб, амбициозен и добро организиран.

Имаме добри услови за тренинг и мислам дека соработката со тренерот Петровиќ ќе ми помогне доста во понатамошната кариера. Се надевам дека ќе составиме добра екипа и ќе имаме успешна сезона со многу победи – се зборовите на Крстајиќ.

Претходно клубот се раздели со тренерот Владимир Мирковски, како нов играч беше промовиран Славчо Темелковски, а соработката ја продолжија Лука Стојановски и Рони Харис.