Името на Жозе Мурињо повторно е во центарот на вниманието на европските медиуми, откако се појавија шпекулации дека би можел да се врати во Реал Мадрид. Сепак, искусниот португалски фудбалски тренер одлучи да стави крај на тие приказни.

Мурињо јасно стави до знаење дека немало никаков контакт од мадридскиот клуб.

– Никој од Реал Мадрид не ме повика, тоа можам да го гарантирам. Доволно долго сум во фудбалот за да знам како се појавуваат вакви гласини, но во овој случај – ништо не се случи – изјави Мурињо за португалските медиуми.

Иако неговото име беше споменувано како едно од решенијата на кои претседателот на Реал, Флорентино Перез, можеше да смета поради неговото искуство и трофеи, засега нема конкретни потези.

Мурињо моментално ја води Бенфика, со која има договор до крајот на следната сезона. Иако јавноста шпекулираше за можна излезна клаузула, неговото враќање во Мадрид во моментов не изгледа реално.