Во верските објекти на МПЦ-ОА се следат препораките на Министерството за здравство и Комисијата за заштита на населението од заразни болести, но тие, според нив, се однесуваат  на тоа на едно место да не се собираат повеќе од 1.000 луѓе, а во црквата не се собираат толку.

Во препораките што ги усвои Владата за заштита на населението од корона вирус беше нагласено дека истите важат за сите, вклучително и за верските заедници, но, како што истакнаа од Владата, натамошното постапување останува на нив.

Презвитерот Бобан Митевски во изјава за Слободен печат објаснува дека и Црквата има некои свои препораки за актуелната ситуација.

– Препораките се да се избегнува поздравување и целување што го има во црквата, да се прави редовна дезинфекција на објектите – вели Митевски.

Презвитерот објаснува дека нема промени во практикувањето на црковните обреди, како што е на пример светата причесна.

– Во однос на причесната имаме работа со светоста. Тука нема промени. Инаку, зошто не би се менувало при сезонски грип на пример? Тоа е света работа – вели Митевски.

И од Комисијата за односи со верските заедници ја следат ситуацијата и препораките, но не одговараат дали во верските објекти се воведени некакви мерки за заштита на верниците кои ги посетуваат црковните храмови.

– Постојано одговорно ги следиме состојбите во државата и поширокиот регион, како и применетите мерки. Во овој момент апелираме секој граѓанин и секој верник со особена сериозност да се придржуваат до препораките од Министерството за здравство со цел лична и колективна заштита- вели директорот на институцијата Даријан Сотировски.