МНР упати вербална нота до Софија за навредите и простачкиот речник на европратеникот Џамбаски
Попладнево македонското МНР упати вербална нота до бугарското МНР поради навредите и провокациите на европратеникот Ангел Џамбаски, објавени вчера на неговиот фејсбук-профил.
МНР преку нашата амбасада во Софија во нотата изразува крајно незадоволство од тврдењата, заканите и навредите во приземното обраќање на Џамбаски.
-Џамбаски во повеќе наврати изразува иредентистички и територијални претензии кон Република Северна Македонија и упатува тешки навреди кон угледот на високи државни претставници на Република Северна Македонија. Упатувајќи закани и тешки навреди, повредувајќи го достоинството на Република Северна Македонија и нејзините граѓани, г-нот Џамбаски се однесува спротивно на заложбите и стремежите изразени во Договорот за пријателство, добрососедство и соработка меѓу двете земји, стои во соопштението од МНР.
Оттаму бараат и очекуваат државното раководство, Владата и Министерството за надворешни работи на Република Бугарија да го осуди и да се огради од изјавите на Џамбаски.
„Изјавата на Џамбазки е говор на омраза и според сите меѓународни и билатерални договори има причина да се реагира. Мора да реагира и бугарската држава бидејќи тоа се веќе територијални претензии и навредливи изјави кон народот и етничките заедници“, изјави денеска министерот Османи.