Универзитетската клиника за детски болести бележи значително намалување на стапката на смртност кај хоспитализирани пациенти во овие две години, до 300 проценти во споредба со претходните години, соопшти директорот доктор Реџеп Мемеди.

Тој се повика на официјалните статистички податоци од информатичкиот систем на Клиниката за периодот 2014–2026 година, чии анализи покажуваат дека во 2015 година процентот на починати пациенти во однос на хоспитализираните пациенти изнесувал 1,51% (апсолутен број на смртни случаи 108), додека во 2025 година стапката на смртност паднала на 0,51 процент (апсолутен број на смртни случаи 39).

Од 2009 година, од кога постои информатичкиот систем на Клиниката, до 2013 година, стапката на смртност е исто така висока, почнувајќи од 1,17 до 1,54 проценти. Особено охрабрувачки се споредбените резултати за првиот квартал од оваа година, односно во првото тромесечие од 2026 година стапката на смртност е 0,27 проценти, што е најниско ниво во последните 17 години, и приближно два пати пониска во споредба со претходната 2025 година, велат од Клиниката.

Пред 10 години, на пример, во првиот квартал од 2016 година, регистрирани се 1758 хоспитализирани пациенти – од кои 37 починале, односно стапка на смртност од 2,10 проценти, додека во првиот квартал од 2026 година регистрирани се 1841 хоспитализирани пациенти, а 5 починале, односно стапка на смртност од 0,27 проценти што претставува намалување од 770 проценти или стапка на смртност 7,5 пати помала во споредба со пред 10 години.

Ова значително намалување на стапката на смртност, како клучен параметар за квалитетот на медицинските услуги, е резултат на заедничката тимска посветеност и 24-часовниот ангажман на најдобрите експерти по педијатрија и целиот медицински и немедицински персонал на Детската клиника. Овие позитивни резултати во последните две години се и плод на подобрувањето на условите во Клиниката – повеќе од 24 капитални проекти и стотици преземени мерки и други активности – од витално значење за Клиниката и здравјето на децата – спроведени во овие 24 месеци мандат, како и плод на вработувањето и ангажирањето на нов медицински, административен и технички персонал, секако, и нивна континуирана едукација и обука, вели Мемеди.

Тој додаде дека надворешните оценувачи од Агенцијата за квалитет и акредитација на здравствени установи во Македонија дале позитивно мислење во извештајот издаден месецов.