Мнозинство Германци го поддржуваат враќањето на задолжителниот воен рок, покажува анкетата на Форса направена пред парламентарните дебати за нов закон за воена служба подоцна оваа недела.

Анкетата, нарачана од списанието „Штерн“ и радиодифузерот РТЛ, покажа дека 54 отсто се за задолжителна служба во Бундесверот, германските вооружени сили, додека 41 процент се против, а 5 отсто се неодлучни.

Истражувањето беше спроведено на 9 и 10 октомври меѓу 1.008 испитаници и е опишано како репрезентативно од „Штерн“.

Задолжителниот воен рок беше суспендиран во Германија во 2011 година, со што практично заврши и регрутирањето и цивилната служба.

Поддршката е најголема меѓу гласачите на конзервативниот блок на канцеларот, со 74 отсто кои го поддржуваат враќањето на регрутирањето. Повеќе од половина (58%) од поддржувачите на централно-левичарските Социјалдемократи, исто така, ја фаворизираат мерката.

Владејачката коалиција на Германија се бори да постигне компромис за закон за нова доброволна воена служба.

Пратениците дебатираат како да се справат со потенцијалниот недостиг доколку не се пријават доволно доброволци. Првото читање на предлог-законот е одложено за една недела и сега е закажано за четврток