Младиот македонски пијанист Андреј Цековски постигна исклучителен меѓународен успех освојувајќи ја првата награда на престижниот натпревар „International Youth Music Competitions“. Андреј, кој е ученик во петто одделение во нижото музичко училиште при ДМБУЦ „Илија Николовски-Луј“, триумфираше во категоријата „USA Classical Hobbyist“, објави „Умно.мк“.

Под менторство на професорката по пијано Марија Диманин-Богоевска, Цековски успеа да се истакне во силната конкуренција на млади таленти од САД, Кина, Австралија, Канада, Полска, Украина, Турција и многу други земји. Стручното жири во својата одлука го истакна неговиот впечатлив настап, нагласувајќи ја неговата техничка прецизност, музикалност и уметничка зрелост која ја покажал на сцената.

Овој голем успех за младиот пијанист не завршува само со признанието. Како победник во својата категорија, Андреј доби официјална покана во септември годинава да отпатува за Њујорк.

Таму, на свечена церемонија, ќе му биде врачена наградата, а ќе има и ретка можност да настапи во рамките на концертот на победниците.

Ова меѓународно признание е уште една потврда за високиот квалитет на македонското музичко образование и за огромниот потенцијал на новата генерација македонски уметници на светската сцена.