Мирисот од цигари лесно се впива во мебелот, текстилот, па дури и во ѕидовите на дом во кој се пушело со години. Неговото целосно отстранување не е брза работа, но со правилен пристап е возможно.

Советите за чистење на г-ѓа Хинч станаа исклучително популарни, па нејзините следбеници редовно ги споделуваат и сопствените искуства. Г-ѓа Хинч е омилена британска инфлуенсерка која споделува практични совети за чистење во фејсбук-група со речиси 700.000 членови, пишува „Сан“.

Следбеничката Паула поставила прашање во групата: „Може ли некој да ми препорача како да го отстранам мирисот од чад од цигари од домот?“ Таа купила куќа во која се пушело 30 години и, како што вели, мирисот е навистина неподнослив. Членовите на групата ја преплавиле со совети.

Корисничката Клер ѝ напишала: „Многу сте храбри што сте купиле дом на пушачи, тоа не е за оние со слабо срце. Ако имате дрвен паркет, најверојатно е полн со катран. Најдобро е да ги отстраните, ѕидовите да ги оголите до малтер и потоа сите површини, ѕидови и тавани темелно да ги измиете најмалку петпати“.

Друга следбеничка додала: „Шеќерниот сапун е одличен за чистење на сите површини, но претходно тргнете ги теписите“.

Имало и предлог да се купи специјална боја што ги блокира мирисите.

„Ако мирисот навлегол во теписите или ткаенините во домот, најдобро е да ги фрлите и да купите нови“, гласи уште еден совет.

Следбеничката Рејчел препорачала: „Пресечете кромид на половина и оставете по едно парче во секоја просторија за да ги впива мирисите“.