Министерот за економија Бесар Дурмиши честитајќи го Меѓународниот ден на трудот Први Мај, соопшти дека инспекциските контроли се засилиле, за да се овозможи да се почитуваат правата на работниците и да се намали сивата економија.

– Среќен 1 Мај – Меѓународниот ден на трудот. На овој значаен ден, изразуваме длабока почит и благодарност до сите работници, кои со својата посветеност и труд, секојдневно придонесуваат за економскиот и општествениот развој на нашата држава. Во изминатиот период, преку социјален дијалог и колективни договори, постигнавме зголемување на платите во повеќе клучни сектори, со што се подобрува животниот стандард на илјадници работници. Истовремено, ги интензивиравме инспекциските контроли со цел доследно почитување на работничките права и намалување на неформалната економија – напиша Дурмиши на неговата Фејсбук-страница.

Тој додаде дека преку Оперативниот план за вработување и активните мерки на пазарот на трудот биле создадени нови можности за вработување, особено за младите и ранливите категории.

– Нашата заложба останува цврста, да изградиме поправеден, поинклузивен пазар на труд и да обезбедиме достоинствени услови за работа за секој работник – напиша министерот.