Meѓународната ликовна колонија „Де Ниро“ во Битола ќе трае до 27 јуни
Ликовни уметници од Виетнам, Мексико, Естонија, Романија, Кина, Србија, Бугарија и Македонија се дел од 18-тото издание на Меѓународната колонија „Де Ниро“ – Битола, којашто се одржува од 20 до 27 јуни во Културниот центар на Меѓународна колонија „Де Ниро“ во Цапари, како и на различни локации низ Битола.
– За мене како организатор е голема чест тоа што во текот на овие 18 години на колонијата учествувале над 200 ликовни уметници од 30 држави од Европа и светот, кои досега создале над 500 уметнички дела. Оваа година особено ме радува потпишувањето на меморандум за соработка на Меѓународната ликовна колонија „Де Ниро“ со Културно-информативен центар – Битола, значаен чин за натамошна плодна соработка – изјави Драги Филевски, организатор на колонијата.
Во рамките на разновидната програма на колонијата ќе се реализираат и настаните „Ден на уметноста“, во чест на Благоја Стефановски – Баге, еден од бардовите на македонската култура; Поетско-ликовен настан, промоција на книгата „Надвор од времето“ на Лили Бошевска со песни инспирирани од делата на светски познатиот уметник Виктор Мануел Хернандез Кастиљо од Мексико, кој е гостин на промоцијата со своја изложба, во Палата на културата – Офицерски дом; Промоција на видеото на Кети Талевска за мозаикот на Мирослав Масин, музички перформанси и други.
Меѓународната ликовна колонија „Де Ниро“ со своето 18-ти издание ќе заврши на 27 јуни.