Изет Меџити од Коалицијата Вреди, на прес-конференција вечерва порача дека тие се апсолутни победници во албанскиот кампус и оцени дека денешниот изборен процес беше сè освен демократски. Државните институции кои имаа задача да го гарантираат процесот, Меџити вели дека се ставиле во служба на ДУИ.

-За сите настани од изборите ќе ги информираме сите амбасади, набљудувачките мисии и други релевантни институции. Сакам да сите да им објаснам за насилството врз гласачкото право ќе се одговара. Денес драги Албанци партијата која владееше со институциите 22 години го покажа вистинското лице. Со бојкот ДУИ се обиде да го врати политичкото организирање на Албанците во Македонија на претполитичко ниво. Партијата која излезе под името „Европски фронт“, денеска го бојкотираше изборниот процес, чин спротивен на секој европски стандард, вели Меџити.

Тој го праша Бујар Османи како утре ќе го оправда однесувањето на изборите пред меѓународните партнери.

-Со денешниот ден Али Ахмети ја запечати својата конечна изолација од сите релевантни општествени и политички чинители, како и меѓународните партнери. Од денеска тој е најголемиот политички губитник, додаде Меџити.