Германската полиција истражува случај во кој медицинска сестра е осомничена за намерно труење на пет предвремено родени бебиња.

Полицијата од градот Улм вчера соопшти дека во плакарот на медицинска сестра пронашла шприц со мајчино млеко и морфиум. Таа е осомничена дека им давала дрога на пет предвремено родени деца, со намера да убие, пишува Дојче веле.

Новороденчињата почнале да имаат сериозни проблеми со дишењето

Во раните утрински часови на 20 декември, пет новороденчиња во Медицинскиот центар на Универзитетот Улм одеднаш почнале да имаат сериозни проблеми со дишењето.

Полицијата соопшти дека на бебињата веднаш им била укажана потребната лекарска помош и дека лекарите сметаат дека тие нема да имаат дополнителни здравствени проблеми.

Мајчино млеко измешано со морфиум

Болницата стапила во контакт со полицијата, откако открила голема количина морфиум во урината на децата кои имале проблеми со дишењето. Потоа, полициските службеници извршиле претрес во шкафчињата на медицинскиот персонал и пронашле шприц со мајчино млеко измешано со морфиум.

Неименуваната медицинска сестра сè уште не е официјално обвинета, но се води истрага поради сомнеж за пет точки од обвинението за обид за убиство и тешка телесна повреда.