Маж претепал тригодишно дете и жена
Инцидентот се случил во скопската населба Шуто Оризари.
За кривични дела тешка телесна повреда и запуштање и малтретирање на дете гласи поднесениот обвинителен акт против жител на скопската населба Шуто Оризари кој на седми минатиот месец при вршење семејно насилство со умисла тешко повредил жена со која живеел во вонбрачна заедница и тешко ја повредил нивната тригодишна ќерка.
Во обвинителниот акт против насилникот пишува:
„Тој прво почнал вербално да ја навредува и физички ја нападнал, удирајќи ја со тупаници во пределот на лицето. Продолжил да ја удира по главата и телото и со парче дрво и железна шипка, а потоа насилно ја турнал на подот и ја удирал со клоци во стомакот. И нанел тешки повреди на оштетената, изразени во вид на набиеници, скршеници и крвни подливи. Додека оштетената се обидувала да повика помош, обвинетиот се доближил до нејзината малолетна ќерка на возраст од три години, па грубо запоставувајќи ја својата должност за грижа и воспитување како очув, започнал да ја малтретира и да ја удира со дрвен предмет по телото, да ја гризе и да и ги става рацете на шпоретот, со што и нанел тешки телесни повреди“, тврдат од ОЈО и бараат од судија на претходна постапка да му го продолжи притворот.