Босна и Херцеговина утре во Зеница (20:45 часот) ќе се обиде да ја совлада Италија во натпревар што носи директен пласман на Светското првенство.

Поранешниот прв човек на Динамо Загреб и контроверзниот бизнисмен Здравко Мамиќ, кој избега во БиХ откако во Хрватска беше правосилно осуден на шест и пол години затвор поради извлекување околу 52 милиони куни од клубот, е уверен дека домашната селекција ќе слави во овој историски дуел.

БиХ има шанса да испише ново поглавје во својата спортска историја, а во пресрет на натпреварот, познатиот спортски новинар Сабахудин Бахо Топалбегиревиќ во вклучување во живо на Инстаграм разговараше со повеќе јавни личности меѓу кои беше и Мамиќ.

„Навивам за БиХ. Секако дека ќе бидам во вторник во Зеница. Ќе седам во првите редови, со знаме или шал на репрезентацијата, заедно со моите внуци ќе навивам за Босна и Херцеговина“, порача Мамиќ.

Тој додаде дека е недозволиво некој што живее во земјата да не ја поддржува репрезентацијата.

„Секој може да навива за кого сака, но нормално е сите што живееме тука и чии деца растат овде да бидеме со БиХ. Во цела Босна сакам заедно да славиме, да ја кренеме на нозе, време е оваа земја да ја е*e мајката на цел свет““, истакна тој.

На крајот испрати и порака за заедништво, повикувајќи на масовна поддршка и славје доколку селекцијата избори пласман на Светското првенство.