Босанскиот фудбалски клуб Сараево ја информираше јавноста дека нов играч на екипата е Даниел Аврамовски кој на својот дрес ќе го носи бројот „27“.

Македонскиот репрезентативец официјално потпиша договор на две години.

– Даниел Аврамовски е врвен играч и стандарден македонски репрезентативец. Ќе им направи проблем на противниците бидејќи има одличен преглед на играта, опасна лева нога и со ефикасен финиш. Освен можноста за игра на неколку позиции, има голем потенцијал за нашиот напад и неговата одлична игра од прекин. Едвај чекаме да го видиме на теренот во бордо дресот – рече Александар Васоски, шефот на стручниот штаб на ФК Сараево, кој соработуваше со Аврамовски за време на неговиот престој во Вардар од Скопје.

Последен клуб на Аврамовски беше турскиот Кајсериспор, а претходно ги бранеше уште боите на Работнички, Македонија ЃП, Црвена звезда, ОФК Београд, Олимпија и Војводина.

– Првите впечатоци се многу позитивни. Се сретнав со сите играчи, тренери и членови на лекарскиот тим. Се надевам дека овој период на адаптација во новиот клуб ќе помине брзо, но момците се сите тука за мене и верувам дека ќе имаме добра соработка на теренот и надвор од него.

Зошто Сараево? Уживав во соработката со тренерот Васоски во Вардар, а проектот на клубот што ми беше претставен покажува сериозност и долгорочност. Тоа го потврдуваат и потезите во овој преоден рок. Многу од моите поранешни соиграчи се денес во Сараево. Добро ги познавам Суљиќ, Кобиљар, Лазиќ и Крсте Велкоски и информациите што ги имам за ФК Сараево велат дека тоа е голем клуб со фантастични навивачи – вели Аврамовски за клупскиот сајт.

Во најсилниот шампионат на Босна и Херцеговина Сараево е далеку од трката за титулата, се наоѓа на четвртото место со 28 бодови, дури 20 помалку од водечкиоте Зрињски.