Со пригодна порака упатена до театарските доајени, некогашни и сегашни актери и до сите љубители на театарот на 3 април Македонскиот народен театар одбележа 75 години од првата премиера – претставата „Платон Кречет“ во режија на Димитар Ќостаров.

– Иако денес сцената е празна, сите ние го чувствуваме мирисот на сцената и театарската светлина во нас. Сите овие изминати години беа исполнети со дружење, смеа, креативност, силина, моќ, радост… Вие, актерите, од различни генерации одигравте/играте на сцената со бескрајна посветеност, страст, жар, пожртвуваност и секогаш дававте/давате сѐ од себе. Огромен е бројот на режисерите, драматурзите, сценографите, костимографите, композиторите, секторот светло, секторот тон, секторот видео, инженерите, инспициентите, гардероберите, реквизитерите, шминкерите, фризерите, изработувачите на сценографија, декоратерите и администрацијата, кои со неуморна сила секогаш сте присутни зад сцената, овозможувајќи непречено да се одвива магијата и вашата посветеност е непроценлива. Сите заедно направивме театарот да живее, расте и се развива, и истовремено да се прикаже на сцената мигот од животот пред верната публика!

Иако прв пат се соочуваме со празна сцена и празни седишта, повторно светлата ќе се запалат, сценографијата ќе биде на сцената и вие, актерите, ќе ги облечете костимите и изговорите текст, затоа што театарот бил, тука е и ќе остане засекогаш! Иако сега ова е тивок период на сцената, неговото бескрајно патување низ времето продолжува со креирање и планирање на нови претстави, проекти, изложби…

Театарот отсекогаш бил во нашите срца и мисли! Поради тоа, на сите кои сте биле и сте дел од МНТ на било кој начин, би сакале да ви заблагодариме за сѐ и за секоја ваша пожртвуваност да ви оддадеме почит! – стои во пораката на МНТ.