Македонскиот мотоциклист Кочоски со две втори места на стартот на БМУ Европскиот шампионат
Македонскиот мотоциклист Синиша Кочоски имаше одличен настап на стартот од новата сезона во БМУ Европскиот шампионат.
Членот на „Сајлент Хантерс“ кој минатата сезона освои двојна „круна“, на првите две трки во Серес, Грција забележа две втори места и така покажа дека и оваа сезона ќе води битки со најдобрите во овој шампионат.
– Иако немав многу време за подготовки, задоволен сум од настапот на првите две трки. Имав послаби стартни позиции, но на самите трки успеав да ја анулирам таа негатива и стигнав до два подиуми. Ова е само почеток на сезоната, свесен сум дека конкуренцијата сега ќе биде поголема од лани, но спремен сум за вакви предизвици и верувам во уште многу подиуми оваа сезона – вели Кочоски.
Кочоски е актуелен шампион во БМУ Европскиот шампионат во категоријата Ф1000, како и македонски шампион.
Оваа сезона се натпреварува едно скалило погоре – СТК 1000. Пред една седмица потпиша договор за спонзорство со компанијата MОZZART која уште еднаш покажа дека е вистински поддржувач на македонските спортски шампиони.