Македонија постигна одличен резултат на 23. издание на детската Евровизија, кое вечерва се одржа во Тбилиси, Грузија. Нашата претставничка Нела Манческа со песната „Miracle“ го освои седмото место во конечниот пласман, во конкуренција од 18 земји.

Настапот на нашата претставничка беше високо оценет од стручните жирија, од кои доби вкупно 92 поени, што ѝ донесе петто место по гласовите на жирито. Со додавање на гласовите од публиката, Македонија собра вкупно 49 поени од гледачите и го заврши натпреварувањето на седмата позиција.

Манческа се претстави со моќна и сигурна изведба, која беше наградена со силен аплауз во салата. Да потсетиме, песната „Miracle“ е авторско дело на Лазар и Магдалена Цветкоски.

Победата на годинашната детска Евровизија ѝ припадна на Франција со песната „Ce Monde“, која доби најмногу поени и од жирито и од публиката. Француската претставничка Лу Делез освои 152 гласа од жирито, а дополнителни 96 поени пристигнаа од гледачите, што ѝ обезбеди убедлива победа. Второто место го освои Грузија, додека Украина заврши на третата позиција.

Сите досегашни македонски претставници на Евровизија: „Proud“ нѐ направи горди, а цела Европа танцуваше на „Нинанајна“