Мајката на Пино: Ангела ќе излезе од затвор, ќе оформи семејство, Пино ништо од тоа нема да види, никогаш
Мајката не ја слушна пресудата лично, бидејќи веќе два дена е во Италија, во домашна изолација. Ја известил адвокатот.
Ангела сега има 22 години. По завршувањето на затворската казна, таа на 40 години ќе излезе од затвор и ќе си го продолжи животот како слободен човек. Веројатно ќе си оформи семејство, ќе добие деца… Ќе продолжи таму каде што застанала. Ќе живее, ќе се смее, ќе го гледа сонцето, месечината… Пино ништо од тоа нема да види, никогаш, раскажува во телефонски разговор за ,,Фокус,” Маја Трпковска, мајката на Пино Секондо, 26-годишното момче кое беше убиено во декември 2018 година.
-Нема ниту ние да го видиме, никогаш. Неговите деца нема да се родат, јас моето дете нема да го прегрнам никогаш, оти така сакале и одлучиле Ангела и убиецот Фуркан – вели Маја Трпковска, мајката на Пино Секондо.
Денес скопјанката Ангела Ѓорѓиевска беше осудена на 19 години затвор за помагање во неговото убиство. Али Фуркан кој со пушка го застрелал во главата Пино, а потоа со Ѓорѓиевска заедно го закопале во атарот на Љуботен, е во бегство.
Мајката не ја слушна пресудата лично, бидејќи веќе два дена е во Италија, во домашна изолација. Ја известил адвокатот. Вели дека со сопругот, кој има здравствени проблеми, се уште се во шок, бидејќи очекувале поголема казна.