Во врска со објавените медиумски написи во кои се тврди дека Државниот завод за ревизија утврдил значителни неправилности во финансиското работење на Акционерското друштво за приредување игри на среќа – Државна лотарија на Република Северна Македонија за 2024 година, без притоа да се направи јасна и суштинска дистинкција помеѓу периодот на управување од страна на претходното раководство од СДСМ и ДУИ и периодот на работење под новото раководство, Државна лотарија на Република Северна Македонија најостро реагира и го доставува овој демант.

Ова е првата реченица во демантот/соопштение што го испрати Државната лотарија, откако медиумите направија новинарски текстови врз основа на Извештај од Државен завод за ревизија, преполн со наброени неправилности и сомнежи за злоупотреби на пари.

„Објавените наводи се неосновани, тенденциозни и нецелосни, бидејќи во нив свесно или несвесно не е направена временска и управувачка разграниченост помеѓу периодот во кој Друштвото било управувано од претходното раководство од СДСМ и ДУИ и периодот во кој управувањето и одговорноста ги презема новото раководство. Ваквиот пристап создава погрешна слика во јавноста, која доведува до манипулативно поврзување на констатации од различни временски периоди и претставува сериозно отстапување од принципите на објективно, точно и одговорно информирање“, пишува во демантот.

Оттаму нагласуваат дека новото раководство, веднаш по преземањето на функцијата, проактивно и транспарентно се обрати до Државниот завод за ревизија со Барање бр. 02-6328/1 од 12.09.2024 година, со кое иницираше целосна ревизија на финансиските извештаи и на целокупното работење на Друштвото, со цел утврдување на фактичката состојба, идентификација на евентуални неправилности наследени од претходното раководство и воспоставување засилен систем на финансиска дисциплина, отчетност и законитост.

„Во тој контекст, селективното пренесување на поединечни делови од ревизорскиот извештај, без јасно наведување на временската рамка и одговорното раководство, претставува недозволива медиумска интерпретација која директно го нарушува угледот на Друштвото и на актуелното раководство. Оттука, бараме од медиумите кои објавиле вакви содржини веднаш да ги повлечат или коригираат неоснованите и нецелосно интерпретирани наводи, јасно да направат дистинкција помеѓу периодот на управување на претходното раководство од СДСМ и ДУИ и периодот на новото раководство, и да го усогласат својот текст со принципите на вистинито, целосно и објективно информирање на јавноста. Во спротивно, Државна лотарија на Република Северна Македонија ќе биде приморана да ги искористи сите расположливи правни средства, вклучително и покренување постапки за клевета и нарушување на угледот, согласно важечките закони. Новото раководство на Државна лотарија на Република Северна Македонија останува цврсто определено кон транспарентно, законито и одговорно работење, како и кон целосна соработка со сите надлежни институции, но истовремено ќе реагира решително против секој обид за дезинформирање на јавноста и политички или медиумски манипулации“, велат од Лотарија.

Во Извештајот на Државниот завод за ревизја никаде не е спомнато време на владеење на СДСМ и ДУИ и време на владеење на ново раководство.

Ревизорите се сомневаат дека во Државната лотарија имало злоупотреба на пари