Велика Британија сака самостојно да го користи своето нуклеарно оружје за да ја одврати Русија поради зголемената загриженост за нејзината ранливост на политички промени во доктрината на Белата куќа, пишува британскиот весник „Дејли експрес“.

„Штом проектилите ќе се најдат на подморницата, нивното распоредување ќе биде прашање на Владата на Обединетото Кралство и на никој друг, нема сомнеж во тоа“, изјави за весникот висок функционер на британската морнарица.

Авторот на материјалот потсетува дека, иако Обединетото Кралство усовршува и произведува сопствени нуклеарни боеви глави и системи за наведување, за нивна испорака мора да се користат американски ракети Тридент Д5, изнајмени од САД.

Велика Британија и САД продолжуваат да работат според Договорот за заемна одбрана од 1958 година, кој овозможува размена на специјализирани технологии меѓу двете земји, наведуваат медиумите.

Во 1963 година, американскиот претседател Џон Ф. Кенеди ѝ даде на Британија оперативна автономија во употребата на нуклеарно оружје користејќи американски системи за испорака.