Лига Европа: Адеми и Ристовски за полуфинале против Виљареал
Денеска со жрепка во Нион ги дознавме и четвртфиналните парови во фудбалската Лига Европа, Динамо Загреб на македонските репрезентативци Аријан Адеми и Стефан Ристовски добија противник од Шпанија.
После вчерашната сензација која ја приреди хрватскиот клуб елиминирајќи го Тотенхем, ќе се обиде да ја продолжи европската бајка преку Виљареал, следниот ривал на „модрите“ во натпреварувањето.
Манчестер јунајтед моментно како еден од најголемите фаворити за освојување на трофејот оваа сезона, ќе ги одмери силите против шпанската Гранада.
Англија има уште еден претставник, Арсенал ќе се соочи со уште едно големо изненадување во ЛЕ, чешката Славија Прага. А најинтересно можеби се очекува да биде на пресметката помеѓу холандскиот Ајакс и италијанската Рома.
Лига Европа
Сезона 2020/2021
Четвртфинале, двојки –
Гранада – Манчестер јунајтед
Арсенал – Славија Прага
Ајакс – Рома
Динамо Загреб – Виљареал
Првите натпревари од четвртфиналната фаза ќе се одиграат на 8 април, а реванш средбите една недела подоцна.
Во полуфиналето (29 април и 6 мај 2021 година) Динамо Загреб доколку го елиминира Виљареал ќе игра против подобриот од двомечот Арсенал – Славија Прага.
Големото финале годинава во Лига Европа ќе се одржи на 26 мај во Гдањск Арената во Полска.