Пред кошаркарите на МЗТ Скопје Аеродром е најважниот период од годината во кој ќе се брка остварување на секогаш највисоките цели, а кој почнува на 27 април (сабота) со првиот полуфинален дуел од АБА 2 лигата против Спартак Суботица од Србија (19.00 часот) на домашен терен во СЦ „Јане Сандански“.

Ова дефинитивно е една од најважните пресметки во досегашниот дел од сезоната. Тоа го знаат и играчите предводени од тренерот Васко Атанасов, кои изминатиов период напорно работеа на дополнително усовршување на сѐ што досега имаа работено.

Предизвикот е голем, противникот е фаворизиран, но актуелниот македонски шампион секогаш бил најдобар и најборбен кога било најпотребно.

МЗТ уште еднаш ги повикува навивачите, како и во четвртфиналниот дуел, така и овојпат слободен ќе биде влезот за полуфиналниот меч со Спартак Суботица.

– Само со заеднички сили би можеле да дојдеме до посакуваното финале, а за што ни треба уште една во низа МВП партија на нашиот „шести играч“, за која не се сомневаме дека ќе се случи. В сабота сите патишта нека водат во „Јане Сандански“, а трибините нека бидат претесни да ги примат сите што сакаат да ни помогнат. Ако се случи тоа, тогаш уверени сме дека на крајот сите заедно ќе се радуваме – објавија од КК МЗТ Скопје Аеродром.